Ońtústik Qazaqstan oblysynyń ákimi J.Túımebaev Qytaı Halyq Respýblıkasynyń Almatydaǵy Bas konsýly Chjan Veı myrza bastaǵan qytaılyq konsýldyq ókilderimen kezdesti.
Kezdesý barysynda taraptar eki el arasyndaǵy saýda-ekonomıkalyq, mádenı-gýmanıtarlyq jáne týrızm salasyndaǵy yntymaqtastyqtyń perspektıvaly baǵyttaryn keńeıtý máselelerin talqylady. Óz kezinde oblys ákimi óńirdiń áleýmettik-ekonomıkalyq damý jaǵdaıy, bolashaqtaǵy damý múmkindikteri men qolǵa alynyp jatqan irgeli jobalar týraly baıandady.
Qazaqstan men Qytaı arasynda strategıalyq seriktestik pen túrli salalarda tyǵyz qarym-qatynas ornaǵanyn aıtqan oblys ákimi shırek ǵasyrda eki memlekettiń senimdi jáne mazmundy dıalogy ornatylǵanyn atap ótti.
«Búginde eki eldiń ekonomıkalyq yntymaqtastyǵy aıtarlyqtaı alǵa jyljyp, qos eldiń arasyndaǵy qarym-qatynas nyǵaıa tústi. Máselen, Qazaqstan men Qytaı arasyndaǵy Indýstrıalandyrý jáne ınvestısıalar salasyndaǵy yntymaqtastyq týraly kelisimniń sheńberinde elimizde 51 joba júzege asyrylýda. Onyń ishinde bizdiń oblysta kórshi elmen birlesken 5 joba qolǵa alyndy. Ol modernızasıadan ótken Shymkent munaı zaýyty men maqtadan jip óndiretin «Hlopkoprom selúloza» zaýyty, metalýrgıa óndirisindegi «Amır-A» JSHS-gi men polıetılen qaldyqtaryn qaıta óńdep, shtapeldi talshyq shyǵaratyn «Green Technology Industries» kásiporyny jáne túıe sútin óńdeıtin «Golden Camel Group LTD» zaýyty»,-dedi aımaq basshysy.
Sonymen qatar ákim Ońtústik Qazaqstan oblysy men Qytaıdyń óńirleri arasyndaǵy ózara tıimdi saýda-ekonomıkalyq jáne ınvestısıalyq yntymaqtastyqty damytýǵa zor múmkindikter bar ekenine senim bildirip, aýyl sharýashylyǵy men ónerkásip jáne týrızm salasynda áriptestik baılanysty damytýǵa daıyn ekenin jetkizdi.
Ońtústik Qazaqstan oblysyna jasaǵan tórtinshi sapary ekenin aıtqan Bas konsýl árbir kelgen kezinde óńirdiń barlyq baǵyt boıynsha damyp jatqanyna kýá bolatyndyǵyn aıtty.
«Ońtústik Qazaqstan eldegi kóptegen kórsetkishter boıynsha kósh ilgeri ekendigin bári biledi. Munda ınvestorlar úshin qolaıly jaǵdaı jasalǵan. Sondyqtanda eki taraptyń múddelerine saı keletin birqatar usynystardy jetkizsem deımin. Máselen, aýyl sharýashylyǵy ónimderi men azyq-túlik ónimderin qaıta óńdeý salasy men turmystyq qaldyqtardy qaıta óńdeý, energıa kózderin damytý jáne qalalyq jáne naryqtyq ınfraqurylym qurylysy aıasyndaǵy yntymaqtastyqty keńeıtý»,-dedi Chjan Veı.
Oblys ákimi J.Túımebaev jalpy eki taraptyń da áleýmettik-ekonomıkalyq damýy turǵysynan óz tıimdiligin kórsetetin bul usynystardy qoldaıtyndyǵyn aıtyp, eki eldiń Memleket basshylarynyń bastamasymen qolǵa alynǵan «Nurly jol» baǵdarlamasy men «Jibek jolyn» jańǵyrtý jobalaryn sapaly oryndaý baǵytynda yntymaqtasa jumys isteýge nıet bildirdi.
